Почна формирањете на ракометната АБА – на следниот собир ќе ги викнат и клубовите!

23 март 2026 - 12:29

Претставници на Ракометна федерација на Србија, Ракометна федерација на Македонија и Ракометна федерација на Црна Гора викендов одржаа состанок на кој главна тема беше можноста за формирање регионални ракометни лиги во машка и женска конкуренција.

На средбата беа разгледани повеќе модели за организација на натпреварувањето, вклучително и различни варијанти на лигашки систем. Целта на иницијативата е подигнување на квалитетот на ракометот, зголемување на конкурентноста меѓу клубовите и дополнително зајакнување на регионалната соработка. Учесниците на состанокот изразија заеднички став дека регионалните лиги треба да стартуваат веќе од септември годинава, со јасно поставени организациски правила и професионални стандарди.

Конечната одлука за форматот на натпреварувањето се очекува да биде донесена на следниот состанок, кој е закажан за април во Скопје. Тогаш треба да бидат усогласени сите клучни детали и дефиниран конечниот модел на лигите. На средбата во Скопје се очекува да присуствуваат и претставници на клубовите, кои ќе бидат вклучени во процесот на донесување на финалните одлуки.

Федерациите во меѓувреме ќе продолжат со интензивна комуникација и координација со цел успешна реализација на овој проект, кој треба да придонесе за понатамошен развој на ракометот во регионот.