Пелистер беше блиску до сензација во Париз, потклекна во финишот кај ПСЖ!

18 септември 2025 - 22:24

Македонскиот ракометен шампион Пелистер загуби на тешкото гостување кај францускиот гигант ПСЖ со 27-33 во второто коло од групната фаза во Лигата на шампиони (ЛШ). Иако резултатот на крајот е убедлив, битолчани на шест минути пред крајот имаа нерешен резултат, а претходно водеа и со три разлика. 

Првото полувреме понуди големи возбудувања, а Пелистер парираше долго време, меѓутоа ПСЖ потоа направи исчекор и поведе со 11-7. Сепак, битолчани во финишот влегоа во одлична серија од 5-0 и израмнија на 16-16.

Пелистер беше одличен и во второто полувреме, каде што водеше со „плус три“ (22-19), но проблемите почнаа по неколку контроверзни одлуки на исландските судии кои ги извадија од колосек „зелено-белите“, па тоа го искористи ПСЖ за на крајот да триумфира со 27-33.

Најефикасен во победничкиот состав беше Пранди со 11 погодоци, додека Манасков запиша пет голови за Пелистер.

Исто така вечерва, Барселона беше поразена на домашен терен во дербито од Магдебург со 21-22 во драматична завршница.

Standings provided by Sofascore