Црвено-црните како казнена експедиција: Вардар го „избрка“ тренерот на Манасков!

01 октомври 2018 - 11:42

Ракометарите на Вардар со завчерашната победа како гости над унгарски Веспрем го задржаа максималниот учинок сезонава во Лигата на шампионите (три од три), а воедно му донесоа големи проблеми на противникот кој непосредно по поразот остана и без тренерот Љубомир Врањеш.

Според информациите од Унгарија, покрај стратегот, жртва на неочекуваниот, барем за унгарската јавност, пораз од црвено-црните е и тим-менаџерот на Веспрем, Еклемовиќ. Унгарците по три кола имаат само една победа, што дефинитивно ја прели чашата кај управата на овој клуб.

Врањеш не го прими спортски поразот од Вардар, откако на прес-конференцијата по мечот алиби бараше во, според него, тенденциозното судење во корист на македонскиот тим.