Милано веќе почна да го „средува“ Вардар – ќе дебитира против Струга (ФОТО)

14 ноември 2024 - 14:02

Новиот тренер на Вардар, Гиљермо Милано, пристигна во Скопје и веќе ги одржа првите тренинзи со екипата, со која се очекува да се вмеша во борбата за шампионската титула и трофејот во Купот на Македонија.

Аргентинскиот стратег, кој има долгогодишно искуство во ракометот, беше ангажиран од клубот со надеж дека ќе донесе нова енергија и свежи идеи во тимот. Тој се смета за еден од најталентираните млади тренери во Јужна Америка и неговиот потпис со Вардар е знак на амбицијата на клубот да продолжи со успешните резултати и постигнувања на домашната и меѓународната сцена.

При пристигнувањето, Милано веднаш започна со интезивни тренинзи во салата „Јане Сандански“, каде што на првиот тренинг ја имаше можноста лично да се запознае со секој од ракометарите и да стекне увид во нивните индивидуални способности. Атмосферата на тренинзите е позитивна и полна со ентузијазам, иако неколку играчи, кои имаат мали повреди, се поштедени од дел од тренинг сесиите, за да можат што побрзо да се рехабилитираат и да се вратат во тимот.

Гиљермо Милано ќе дебитира на клупата на „црвено-црните“ во сабота, кога Вардар ќе го одигра натпреварот против Струга во рамките на 11. коло од Супер лигата.