„Алкалоид останува верен на македонскиот концепт - странците се додадена вредност!“
Тимот работи во речиси комплетен состав, а единствено отсуствува кадетскиот репрезентативен голман Ѓорѓи Николовски, кој настапува на Европското првенство до 18 години. Тренерот Кирил Лазаров е задоволен од она што го видел на стартот од подготовките и истакна дека играчите веќе се навикнати на високите стандарди кои ги бара клубот.
„Ние работиме повеќе време и веќе воспоставивме ред и дисциплина. Како минува времето сите станаа поквалитетни и посвесни што е потребно за повисок перформанс и висок стил на игра, односно тоа што го бара Европа и што го бараат најдобрите клубови. Задоволен сум од почетокот на подготовките, имаме добра атмосфера, квалитетни услови и работиме со голем елан и задоволство“, изјави Лазаров.
Сепак, најинтересниот дел од неговото обраќање се однесуваше на летните засилувања и стратегијата на клубот. Лазаров нагласи дека Алкалоид нема да отстапи од концептот на развој на македонските играчи, но дека ангажманот на тројца искусни странци е направен со јасна цел – екипата да добие дополнителен квалитет.
„РК Алкалоид заедно со РК Мулти Есенс уште од формирањето на клубот оди чекор по чекор и стратегиски го развива клубот и македонскиот ракомет. Во моментов како клуб даваме повеќе од 50 репрезентативци во сите категории и продолжуваме да работиме на производство на ракометари и за клубот и за репрезентациите. Но, со оглед дека конкуренцијата се засилува и Суперлигата станува сè поквалитетна, се одлучивме за мали промени за да добиеме дополнителен квалитет и да останеме компетитивни и на домашна и на меѓународна сцена. Тоа што го создадовме како квалитет го задржавме и се надополнивме со тројца искусни и квалитетни играчи кои треба да бидат додадена вредност“, потенцираше Лазаров.
Тој додаде дека имињата сами по себе не гарантираат успех и дека најважно е новите играчи да се вклопат во системот.
„Имињата не ја даваат целата слика. За да се направи тим треба да се работи, да има дисциплина и да се воспостави систем. Од тоа што го гледам, комплетно сум задоволен од сите играчи. Кога имате квалитет за работа, многу е полесно и тренингот е порелаксиран. Ако треба да сумирам, иако е рано, чувствувам задоволство како прв тренер.“
Алкалоид ќе остане во Маврово до завршувањето на базичните подготовки, по што ќе следуваат контролните натпревари. Засега се договорени дуели со Прилеп, египетската репрезентација и Нексе, додека првиот официјален натпревар ќе биде на 26 август против Партизан во Регионалната лига.