И Алкалоид се согласи - двете полуфиналиња од Купот се играат в петок

15 мај 2024 - 12:42

Алкалоид го прифати предлогот на Вардар да го одиграат нивниот натпревар ден подоцна со цел да му се излезе во пресрет на Пелистер кој се пожали дека ќе има ден помалку одмор за финалниот натпревар од Купот на Македонија.

Според првичниот распоред Вардар и Алкалоид требаше да играат во четврток на 16. мај, а Пелистер и Тиквеш ден подоцна. На тоа жестоко реагираше битолскиот клуб кој се побуни дека распоредот е неправеден и ќе имаат ден помалку за одмор.

Вардар денеска се јави со соопштение и предложи и тие и Алкалоид да играат во петок. Сега се јавија од Алкалоид и соопштија дека го прифаќаат предлогот на Вардар и согласни се за промена на терминот.

„РК Алкалоид е согласен за промена на терминот за одигрување на полуфиналето од Купот на Македонија со РК Вардар 1961, дуел што е закажан за четврток, 16 мај. 
Од основањето на клубот, како важен принцип во работата, РК Алкалоид ги има одржувањето на спортската култура на високо ниво и зачувувањето на спортските релации и односи со сите клубови и со Ракометната федерација. 
За нас како колектив што се залага за промовирање на позитивните страни на спортот број еден во државата учеството на завршницата на турнирот е од големо значење. Витештвото на теренот е тоа што треба да ги гради односите меѓу клубовите, а ние сме подготвени, во име на спортот, да подадеме рака, да го одиграме натпреварот во терминот што ќе биде дополнително одреден и да се фокусираме исклучиво на натпреварувачкиот момент“, стои во соопштението на Алкалоид.