Пред пет месеци му кажаа дека нема жив да се разбуди, а сега е херој на ЕП 2022!

05 септември 2022 - 12:57

Кошаркарите на Босна и Херцеговина направија вистинско изненадување вчера, откако во возбудлив натпревар го урнаа европскиот шампион Словенија со 97-93, а јунак во победата беше Џенан Муса, кој го заврши мечот со 22 постигнати поени.

Муса дефинитивно е јунак во натпреварувањето затоа што во април преживеа вистинска драма, која можеше да заврши трагично, па по пауза од месец ипол се врати на паркетот и се обидува со БиХ да избори осминафинале.

Муса во април доживеа опасна повреда, по која заврши во болница.

„Беше страшно. Се фатив за врат и не можев да зборувам. Му пријдов на судијата и се обидував да му кажам каков е проблемот, но немав глас. На полувреме во соблекувална застанав пред огледало и видов дека гркланот ми стои на страна. Докторот на клубот влезе во соблекувална и ми го помести гркланот по што можев да зборувам. Го одиграв мечот и заминав дома, а следното утро требаше да одам на прегледи. Мислев дека не е ништо опасно“, кажа Муса.

Муса, сепак, решил да оди во болница и тоа била одлука која му го спасила животот.

„Заминав во болница за секој случај да можам да спијам мирно. А кога забелажаа хематом веднаш ме испратија на снимање. Влегоа пет доктори и ме фати еден од нив за рака, по што ми кажа дека сè ќе биде во ред, но морам да останам во болница. А ако заминам дома, тогаш нема повеќе да се разбудам. Не ми беше јасно. Ми кажаа дека мораат итно да ме оперираат. Во тој момент, ниту кошарката, ниту натпреварите, ништо не ми беше важно. Се јавив кај моето семејство да се збогувам. Испратив порака во групниот разговор со колегите дека им посакувам среќа во кариерата. Мислев дека нема да се спасам“, раскажува кошаркарот.