Мекиќ се врати во МЗТ Скопје - потпиша на една и пол сезона!

Раководството на „штрковите“ попладнево го потврди ангажманот на миленикот на нивните навивачи, кој се очекува да претставува сериозно засилување за екипата во претстојните битки на домашната сцена, во регионалната АБА-лига и во ФИБА Европа купот. Со овој трансфер, Мекиќ го започнува својот трет мандат во сино-белиот табор, по претходните настапи во периодите од 2014 до 2017 и од 2020 до 2023 година.

Во досегашната кариера во Аеродром, репрезентативецот остави длабока трага во клупската историја освојувајќи пет шампионски титули и пехари во Купот на Македонија. Тој пристигнува во спортскиот центар „Јане Сандански“ со дополнително меѓународно искуство, кое особено го збогати за време на настапите во Хрватска, каде со екипата на Задар успеа да стигне до двојната круна.

Од клубот очекуваат дека неговиот камбек, заедно со препознатливата бескомпромисна борбеност и победнички менталитет, ќе донесат дополнителна цврстина и неисцрпна енергија во ростерот за предизвиците кои следуваат.