Шок за Карик: За најдобриот напаѓач на Јунајтед годината е веќе - завршена!

Според британските медиуми, клубот проценил дека на словенечкиот репрезентативец му е потребно дополнително време за рехабилитација од континуираниот проблем со потколеницата, поради што тој најверојатно нема да одигра ниту еден натпревар до крајот на 2026 година. Незгодната повреда му создава проблеми на Шешко уште од минатата сезона, поради што тој ја пропушти претсезонската подготовка, а по враќањето во август повторно почувствува болки и го одигра својот последен натпревар против Брајтон на 16 септември. Медицинскиот тим на „црвените ѓаволи“ се консултирал со врвни специјалисти за да го одреди најсоодветниот пристап кон лекувањето, при што клубот засега се одлучил за конзервативен третман со целосно мирување и рехабилитација наместо хируршки зафат, со цел да се минимизира ризикот од повторно влошување на состојбата.

Отсуството на словенечкиот голгетер доаѓа во исклучително неповолен момент за Манчестер Јунајтед, кој се соочува со сериозни проблеми во офанзивната линија. Иако Џошуа Зиркзе е единствениот преостанат типичен централен напаѓач во составот, менаџерот Мајкл Карик се обидува да најде алтернативни решенија користејќи ги Брајан Мбеумо, Матеус Куња и Бруно Фернандеш во улога на „лажни деветки“. Ниту еден од нив не е природен заменик за Шешко, а ваквата кадровска криза дополнително го зголемува притисокот врз самиот Карик, чија екипа се наоѓа во црна серија од осум последователни натпревари без победа во сите натпреварувања.

Низата вклучува и два тешки порази – од Комо (1-4) во Лигата на шампионите и од Борнмут (0-3) во Премиер лигата. Според „Скај Спортс“, раководството веќе ја разгледувало иднината на стратегот, но одлучило да му даде уште една шанса, која ќе биде ставена на сериозен тест веќе в сабота на тешкото гостување кај Челси на „Стемфорд Бриџ“. Нов кикс би можел да значи и крај на мандатот на Карик, кој итно мора да најде решение за нападот додека го чека враќањето на својот главен адут.