Разводот со Свитолина го забрза крајот на кариерата на Монфис

Според информациите на Лeкип, Монфис тешко се справувал со емотивниот удар од разделбата, која дошла во период кога планирал да ги одигра последните турнири во кариерата и да се прости од тенисот пред домашната публика во Париз.

Четириесетгодишниот Французин првично најавил дека ќе се повлече на крајот од 2026 година, а меѓу планираните настапи биле турнирите во Лион и Париз. Сепак, неговото име било внесено на листата на пензионирани тенисери на 6 октомври, со што официјално престанал да биде дел од антидопинг-програмата за активни играчи. Одлуката предизвикала изненадување во тениските кругови, особено затоа што Монфис не објавил посебно соопштение за крајот на кариерата. Организаторите на турнирот во Лион претходно соопштиле дека тенисерот нема да ја прифати поканата за настап поради лични причини.

Според пишувањата на француските медиуми, разделбата со Свитолина го погодила Монфис во исклучително тежок период, поради што решил да се повлече порано од планираното. Сепак, овие информации се медиумски извештаи, а самиот тенисер засега не ја потврдил јавно причината за својата одлука.

Свитолина во понеделникот објави дека нивниот брак завршува по повеќе од пет години. Украинската тенисерка отворено проговори за емотивниот товар што го носи поради војната во нејзината татковина и потребата повторно да се пронајде себеси. Таа објасни дека се соочувала со непроспиени ноќи, сомнежи и чувство дека постепено се губи себеси, нагласувајќи дека ниту љубовта ниту поддршката од најблиските не можат сами да ги решат сите лични внатрешни борби.

Свитолина истакна дека Монфис бил покрај неа и во најсреќните и во најтешките моменти, но дека со текот на времето сфатила оти мора да продолжи по својот пат надвор од бракот. Двојката стапи во брак во 2021 година, а во октомври 2022 година ја доби ќерката Скај. Двајцата нагласија дека, и покрај разделбата, нивната ќерка ќе остане на прво место и дека ќе продолжат заеднички да се грижат за неа.

„Нашиот брак завршува, но нашето семејство не“, порачаа тие во заедничката објава.

Монфис, кој во кариерата стигна до шестото место на АТП-листата и освои 13 титули, така се најде пред неочекуван крај на една долга тениска приказна. Наместо планираното збогување пред навивачите во Париз, неговото повлекување дојде во период обележан со големи промени во приватниот живот.