Мегваер удри по соиграчите по ремито со Лидс: Ова е недозволиво – ни фали храброст!

„Ѓаволите“ по овој нерешен резултат остануваат на 13-то место во Премиер лигата со само една остварена победа во првите седум кола, што дополнително го зголемува притисокот врз менаџерот Мајкл Карик. Јунајтед прв стигна до предност во 35. минута од натпреварот кога Брајан Мбеумо се запиша во листата на стрелци со реализација од непосредна близина. Сепак, домашниот состав на Лидс успеа да го израмни резултатот веднаш по враќањето од паузата, откако Доминик Калверт-Луин одлично искористи една воиграна акција по изведување на удар од аголот.

Анализирајќи ги тактичките замисли и текот на натпреварот, Мегваер истакна дека тимот не го искористил клучниот простор на теренот.

„Работевме напорно на тактиката во текот на целата недела. Сакавме да бидеме агресивни без топка, преминувајќи меѓу линија од петмина во одбрана и четворица кога напаѓаме. Знаевме дека можеме да извлечеме предност во средината на теренот бидејќи тие имаа само двајца играчи за врска таму. Токму во таа зона требаше да направиме повеќе. Требаше да бидеме похрабри со топката и да ја преземеме иницијативата под притисок. Во моментов не ја покажуваме потребната храброст. За да победуваш за Манчестер Јунајтед, задолжителни се и храброст и ладнокрвност“, изјави Мегваер.

Говорејќи за квалитетите на противникот и испуштената шанса за триумф, дефанзивецот призна дека ремито е најреален исход од ова гостување.

„Никој не може да ги оспори заедништвото и борбениот дух. 'Еланд Роуд' е исклучително тешко место за гостување, а Лидс се наоѓа во одлична серија. Ние, сепак, сме должни да покажеме повисока класа со топката во нозе. Недозволиво е да примиме гол од прекин кој го врати противникот во игра. Во преостанатото време бевме стабилни и тие немаа многу чисти шанси. Околу 70-тата минута ја презедовме контролата и изгледавме поблиску до успех, но генерално ремито е праведен исход“, заклучи англискиот дефанзивец.

Покрај натпреварот, во фокусот на јавноста беше и статусот на Лисандро Мартинез, кој претходно упати остри јавни критики кон клупските шефови и техничкиот директор Џејсон Вилкокс. Мегваер кратко ја искоментира и оваа ситуација во соблекувалната.

„Имаше многу врева околу клубот изминативе денови — како што се случува речиси секоја недела, но сега беше уште понапнато. Лисандро излезе, се извини и веќе го оставивме тоа зад нас“, додаде Мегваер.

ФОТО: Х / @ManUtd