Миовски пред Шкотска: Време е за заедништво - поддршката од публиката ни е ептен потребна!

По воведните порази од Швајцарија и Словенија, нашиот голгетер верува дека излезот од резултатската криза лежи исклучиво во тимската игра. Свесен за притисокот по лошиот старт, Миовски потенцираше дека сега е моментот зборовите да се преточат во дела на зелениот терен.

„Секој период во репрезентацијата носи свои предизвици. Немаме посакувани резултати како што очекувавме, но сега сме во момент кога треба да покажеме заедништво. Можеме да зборуваме многу, да кажуваме било што, но сега треба да бидеме тим и тоа на дело да го докажеме на терен“, изјави Миовски.

Како фудбалер кој секојдневно настапува во шкотскиот шампионат, Миовски одлично ги познава квалитетите, но и мааните на следниот противник, истакнувајќи дека и Шкотланѓаните се соочуваат со свои проблеми.

„Шкотска е одлична репрезентација, знаеме какви играчи имаат и каде настапуваат. Доста играчи во нивниот национален тим се од Ренџерс. И тие се во мала криза во моментов, под притисок се, немаат постигнато гол и имаат нов селектор. На Мундијалот не се покажаа онака како што јас очекував, но знам дека поседуваат квалитет.“

За крај, македонскиот офанзивец упати и директен апел до навивачите, потенцирајќи дека репрезентацијата не може да се извлече само преку индивидуални потези.

„Ние играме дома и мораме да бидеме како еден колектив, не сме селекција која може да се потпре на индивидуален квалитет. Ако бидеме колектив, ќе се вратат резултатите. Фудбалот се игра за публика, колку е пополн стадионот, толку и самодовербата е поголема. Знаеме и свесни сме дека сме во криза, затоа ги повикувам сите навивачи да ни ја дадат поддршката сега кога е најтешко.“

Натпреварот помеѓу Македонија и Шкотска се игра в сабота со почеток од 20:45 часот на Националната арена „Тодор Проески“ во Скопје.