„Го презирав секој момент на теренот, телото почна да ми се распаѓа“

Српскиот тенисер призна дека уште во текот на мечот се чувствувал исклучително лошо, а проблемите со стомакот и физичката исцрпеност сериозно влијаеле врз неговата игра.

„Беше очигледно дека се чувствував ужасно на теренот. За жал, со тоа се мачам практично на секој меч оваа година. Повраќање, мачнина... Тоа е сериозен проблем“, изјави Ѓоковиќ по натпреварот.

Проблемите не застанале тука. Како што одминувал мечот, Ѓоковиќ почувствувал дека целото тело му откажува, а се појавиле и грчеви и болки.

„Потоа целото тело почна да ми откажува, да се распаѓа, со грчеви и болки. На крајот попуштија и грбот и рамото, па не можев да го завршам мечот“, откри Новак.

Иако имал сериозни проблеми, Ѓоковиќ успеал да се врати во мечот и да поведе со 2-1 во сетови. Во четвртиот сет имал и брејк предност, но физички повеќе не можел да го следи темпото.

„Имав брејк во четвртиот сет, но многу се мачев уште од четвртиот гем на мечот“, објасни српскиот тенисер.

Ѓоковиќ призна дека во еден момент размислувал и да го предаде мечот. Сепак, откако успеал да освои сет, повторно поверувал дека може да направи пресврт.

„Размислував да се откажам, но потоа го освоив сетот, па и третиот. Помислив дека можеби има шанса. Во четвртиот и петтиот сет не сакав да предадам, сакав да го завршам мечот“, рече Ѓоковиќ.

Тој, сепак, не сакаше неговите физички проблеми да ја засенат победата на Навоне.

„Не сакам да му ја одземам заслугата. Се бореше, тој е добар човек и голем борец“, порача Новак.

Српскиот ас не криеше колку тежок бил целиот меч за него.

„Не уживав. Всушност, го презирав секој момент што го поминав на теренот“, призна Ѓоковиќ.

По поразот, Новак останува со многу прашања за својата иднина и физичката состојба. Тој призна дека во моментов размислува што точно му се случува и колку долго ќе може да продолжи на ваков начин.

„Не знам дали постои решение. Се обидувам. Ќе видиме. Сега размислувам за тоа што се случува и колку уште можам вака“, заклучи Ѓоковиќ.

За првпат во кариерата, Ѓоковиќ го заврши настапот на Ју-Ес Опен уште во првото коло. Поразот од Навоне дојде по повеќе од четири часа борба, но начинот на кој Новак се чувствувал на теренот остави уште поголема загриженост.