Трагедија на фудбалски натпревар: Гром усмрти 24-годишен фудбалер (ВОЗНЕМИРУВАЧКО ВИДЕО)

07 август 2026 - 11:13

Голема трагедија го потресе фудбалскиот свет, откако 24-годишниот фудбалер Сафван Авае го загуби животот по удар од гром за време на натпревар во Тајланд. Несреќата се случила на стадионот „Сантифап“ во провинцијата Наративат, додека се играл натпревар од регионалниот Голок куп.

Во моментот кога над стадионот беснеело силно невреме, гром удрил директно на теренот, предизвикувајќи паника меѓу играчите и гледачите. Авае, кој настапувал за Јала ФК, бил најблиску до местото на ударот и се здобил со тешки повреди. И покрај брзата реакција на медицинските екипи и итниот транспорт во болница, лекарите не успеале да му го спасат животот.

Освен трагично загинатиот фудбалер, уште најмалку девет лица се здобиле со повреди и изгореници како последица на ударот од гром и биле пренесени на лекување. Локалните власти потврдија дека сите повредени добиле медицинска помош и се надвор од животна опасност.

Снимката од трагичниот настан брзо се прошири на социјалните мрежи и повторно ја отвори дебатата за безбедносните протоколи при играње спортски натпревари во услови на невреме. Југоисточна Азија во моментов се наоѓа во сезоната на монсунски дождови, кога грмежите и ударите од гром се честа појава.