Кузмановски во последните секунди ја спаси Македонија од пораз против Австрија

21 март 2026 - 19:52

Ракометната репрезентација на Македонија одигра реми против Австрија во пријателски натпревар кој се играше во Брегенц, Филип Кузмановски во самиот финиш погоди од седум метри за 30-30.

ЕХФ неделата Македонија ја искористи за да одигра пријателски натпревар против Австрија. Селекторот Кире Лазаров тестираше за бараж мечот за Светското првенство кое е следниот сериозен предизвик за нашата репрезентација.

Двете полувремиња во Брегенц беа идентични кога е резултатот во прашање, на полувремето беше 15-15, а конечниот резултат гласеше 30-30.

Македонија може да жали што не го доби мечот бидејќи во текот на вториот дел имаше и предност од четири голови разлика. Но, Австрија успеа да го изедначи резултатот, па да поведе со 30-29. Сепак Кузмановски со гол од пенал во последните секунди од мечот ја спаси нашата репрезентација од пораз израмнувајќи на 30-30.

Најдобар во нашата репрезентација беше токму капитенот Кузмановски кој постигна десет голови, Марко Митев реализираше пет погодоци.