И од пикадото добро се заработува - светскиот шампион потпиша договор за 20 милиони фунти

10 јануари 2026 - 21:46

Британската телевизија Би-Би-Си објави дека светскиот шампион во пикадо Лук Литлер потпишал рекорден договор за спонзорство во светот на пикадото, вреден 20 милиони фунти. Иако се работи за период од десет години, сепак е астрономска сума за толку мал и често потценет спорт.

Договорот е со производителот за опрема за пикадо „Таргет Дартс“, чии менаџери веруваат дека инвестицијата е оправдана и дека тинејџерот, двократен светски шампион, сигурно ја заслужува.

„Таргет веруваше во мене од првиот ден. Од мојата играчка кариера до мојата линија на производи, изградивме сè заедно и навистина сум возбуден што се обврзав на долгорочно партнерство и што ќе видам колку далеку може да оди ова“, рече Литлер.

Таргет нуди опрема за пикадо, вклучувајќи пикадо, табли и маички за натпревари од Литлер, кои веднаш станаа хит на пазарот. Литлер првпат се појави на Светското првенство во 2024 година, стигнувајќи до финалето како 16-годишник, но беше поразен од Лук Хамфрис. Литлер моментално се подготвува за двомеч од Светската серија во Бахреин и Саудиска Арабија. Најновиот договор покажува дека почетната еуфорија околу пикадото не стивнала - всушност, таа само растела додека тинејџерот продолжува да доминира.

Минатата недела тој заработи 2,7 милиони фунти како награда за освоената светска титула.