Австриски ветеран пред крајот на кариерата конечно дојде до првата победа во СК!

29 ноември 2025 - 10:21

Австрискиот скијач, Штефан Бренштајнер, стигна до својата прва победа во Светскиот куп, триумфирајќи во ноќешната велеслаломска трка во Копер Маунтин, Колорадо (САД).

Тој беше убедливо најбрз во двете трки и зад себе ги остави Хенрик Кристоферсен од Норвешка и Филип Зубчиќ од Хрватска, кои го дополнија подиумот. Станува збор за 34-годишен Австриец, кој главната предност ја оствари во првото возење, а во второто задржа речиси секунда предност во однос на најголемиот конкурент. Во топ-10 завршија и Марко Шварц (Австрија), Алекс Виначер (Италија), Жан Кранец (Словенија), Сам Маес (Белгија), Лео Анжено (Франција), Томас Тумлер (Швајцарија) и Александер Шмид (Германија), кој ја подели десеттата позиција со Лукас Пинеиро Бротен од Бразил.

Големо разочарување доживеа Марко Одермат, доминантниот освојувач на Големиот кристален глобус последните четири сезони. По победите во Зелден (велеслалом) и во супер-џи во Копер Маунтин, Швајцарецот не успеа да ја заврши првата трка. И покрај тоа, Одермат и понатаму е лидер во генералниот пласман со 200 бодови. Зад него се Шварц со 166 и Кристоферсен со 158, додека Пинеиро Бротен има 152, а Бренштајнер 150. Во конкуренција за Малиот кристален глобус во велеслалом, Бренштајнер води со 150 бодови пред Шварц (130), Кристоферсен (116) и Одермат (100).

Машката елита продолжува со сезоната на 4 декември во Бивер Крик со трката во спуст, по што следуваат уште едно спуст-натпреварување (5 декември), супер-велеслалом (6 декември) и нов велеслалом (7 декември).

ФОТО: EPA PHOTO