Љуботен се извини за инцидентот, кошаркарот жали што удрил – родителите се смирија!

Прв се јави тимот на играчот кој го иницира инцидентот, со извинување и појаснување дека иако нема оправдување за постапката, таа била иницирана од претходни тензии кои резултирале со повреда на неговата нога и намерен удар со топка во неговата глава.

„Нашиот играч жали за постапката и ќе понесе соодветни последици по основ на дисциплинскиот правилник. Настанот се случи во атмосфера исполнета со тензични моменти на теренот, односно туркање во простор кон трибинската ограда што резултираше со пад и повреда на ногата, намерно удирање со топка во глава кон нашиот играч... Но без оглед на тоа, нашиот став е дека секогаш мора да преовладува спортскиот дух и почитта. Да не заборавиме - децата учат и растат преку спортот, а наша обврска е да им помогнеме од грешките да излезат посилни и подобри. Ние веруваме во спорт како место за пријателство, фер-плеј и вистински вредности“, се вели во соопштението на Љуботен.

Тренерот и родителите на кошаркарот на Љуботен веќе се извиниле кон играчот на Тетекс и на неговите родители, кое било искрено прифатено.

„Целиот случај е решен помеѓу родителите на двете деца. Претседателот на клубот и тренерот (воедно и татко на детето) ме контактираа и се извинија во нивно име и во име на клубот, а извинувањето е прифатено од моја страна. Ама затоа баш ме интересира што ќе преземе КФМ кон судијата што беше на помалку од еден метар од ситуацијата и досуди 'мртва топка'“, напиша таткото на детето што беше удрено.

Сега на потег е Куќата на кошарката, првенствено да реагира остро и според актите, што би делувало педагошки и како опомена за сите актери во кошаркарскиот спорт дека на насилството не му е место на паркетот, без разлика на тоа што го предизвикало. Казна, секако, мора да има за судиите и делегатот, кои воопшто не реагираа и не го санкционираа ударот, иако резултираше со подолго лежење на повредениот кошаркар на Тетекс.