Меси е најдобар стрелец во МЛС - без ниеден пенал

21 септември 2025 - 16:18

Со двата гола против Ди Си Јунајтед ноќеска, Лионел Меси стигна до бројката од 22 оваа сезона со што се искачи на првото место на листата на стрелци во МЛС.

Зад него сега е Англичанецот, Сем Стариџ од Нешвил со 21 и Габонецот, Бенис Буанга од Лос Анџелес со 19. Сепак, бројките на Меси се нереални дури и за него и дури и за натпреварување како МЛС.

Во овие 22 гола, аргентинскиот ас нема ниеден постигнат од пенал иако за тоа имаше шанса минатата недела кога промаши од белата точка против Шарлот. Интер Мајами и ноќеска доби пенал, но веројатно поучен од претходното промашување, Меси му го подари на Силвети кој исто така беше непрецизен.

За разлика од Меси, второпласираниот Стариџ има дури пет, а третиот Буанга дури седум гола постигнати од пенал оваа сезона. Досега во својата кариера, Аргентинецот има 882 гола и 391 асистенција што значи дека до крајот на оваа сезона би можел да достигне две важни граници во фудбалот.