Ѓоргиев: Нема да излеземе со бело знаме во Европската лига, туку ќе играме за победа!

Капитенот на репрезентацијата Никола Ѓоргиев кажа дека не се плашат од никого во Европската лига и нема да излезат на теренот со бело знаме, туку ќе се борат против секого за победа.

„Секогаш кога почнуваме едно ново поглавје за мене претставува голема среќа и многу сум среќен, возбуден и мотивиран за она што претстои. Првите впечатоци и првите разговори велат дека момците се супер, сите сме добри, попладнево ќе го одработиме и првиот тренинг. Јас сум оптимист, ако не бев немаше да бидам овде и се надевам дека ќе успееме да имаме здраво, а потоа и резултатски добро лето. Од ден во ден почнувајќи од денеска би сакал репрезентацијата да се вклопи, да живее како едно и да напредуваме, да се воигруваме што е можно подобро. Не можам да ветам ништо од старт или да најавувам фајнал-фор бидејќи тоа е преголем залак, во моментов, можеби за три недели нема да биде. Во Европската лига од никого нема да се плашиме и пред никого нема да излеземе со бело знаме и против секого ќе играме за победа, тоа јас можам да го ветам. Што се однесува до Грузија и Грција, тоа е далеку од сега, но нема дилеми дека сите потсвесно мислиме и на тоа. Сега би размислувал од ден на ден, што побрзо да се најдеме, бидејќи некој имал два месеци пауза, некој пет дена и мора да се воиграме што е можно подобро и да излеземе на мегдан. Пријателскиот двомеч со Хрватска е одлична подготовка во пресрет на Златната лига, според мене колку повеќе натпревари играме заедно, толку подобро и верувам дека тоа ќе ни помогне да го набилдаме натпреварувачкиот дух во пресрет на првиот турнир“, вели капитенот на репрезентацијата.

Македонија ја очекуваат настапи во Европската лига од 7 до 22 јуни, кога ќе бидат одиграни шест средби, а потоа на 28 јуни е закажан дуелот против Грузија во евроквалификациите.

Фото: Одбојкарска федерација на Македонија