Историја во НБА: Првпат татко и син заиграа во иста екипа (ВИДЕО)

07 октомври 2024 - 08:12

Она за што сонуваше Леброн Џејмс речиси цела кариера, синоќа се исполни откако заедно со син му Брони заигра во иста екипа и со тоа двајцата влегоа во историјата на НБА лигата.

Иако се работи за претсезонски, односно неофицијален натпревар, Леброн и Брони Џејмс станаа први татко и син кои се најдоа во иста екипа на теренот и тоа на 20. роденден на помладиот. Кога ќе почне сезоната во НБА, остварувањето само ќе се потврди и ќе биде запишано во историјата на најсилната лига во светот. Лос Анџелес Лејкерс играше со Феникс на домашен терен и загуби со 114-118, но исходот од овој меч остана во втор план.

„Ова е нестварно, почестен сум што можам да бидам дел од историјата“, рече тренерот на Лејкерс, Џеј Џеј Редик.

Леброн се подготвува да ја почне својата 22. сезона, а во декември ќе наполни 40 години. Брони во јуни беше избран од Лејкерс како 55. пик на драфтот откако една сезона помина на Уинверзитетот Јужна Калифорнија. Дуелот против Феникс, Леброн го заврши со 19 поени, 5 скока и 4 асистенции, додека Брони не успеа да постигне поени и оствари само 2 скока за 13 минути.