Гвардиола го прифати предизвикот од Арсенал: Сакате војна? Ќе ја имате!

28 септември 2024 - 09:22

Менаџерот на Манчестер Сити, Пеп Гвардиола се надоврза на зборовите на дефанзивецот на Арсенал, Габриел по меѓусебното дерби одиграно минатата недела.

Бразилецот рече дека сите натпревари против Сити се војна и нормални се провокациите меѓу фудбалерите на двете екипи, со оглед на тоа што станува збор за ривали за шампионската титула.

„Понекогаш емоциите ескалираат, тоа Габриел прекрасно го објасни. Тоа е војна, треба да го испровоцираш противникот, да го притиснеш. Ако ме провоцирате, добро, тука сум. Сакате војна? Ќе ја имате! Јасно ми е каков предизвик ни направи Арсенал. Во Англија сме најомразен клуб, сите сакаат да не победат и го чувствуваме тоа“, рече Гвардиола.

Денеска Сити го очекува тешко гостување кај Њукасл во дуел на кој нема да може да смета на двајцата можеби најкреативни играчи во тимот Родри и Де Брујне.