Ристовски: Ние сме екипа која сака да прави чуда, „Олд Трафорд“ сам нѐ мотивира!

После Германија и Италија кои ги победивме во последниот мундијалски циклус, Англија е следен великан за кој сонуваме скалп и тоа како мелем на раната после болниот пораз со пресврт од Украина во петокот.

„Ретко е за Македонија да игра вакви натпревари, на вакви стадиони, а самата лига што ја поседува Англија е врвот на фудбалот. Убаво е да влезеш на „Олд Трафорд“, не ти треба некоја посебна мотивација, туку - да излезеш и да покажеш тоа кое го поседуваш. Ние сме очигледно таква екипа, која игра големи натпревари и сака да прави чуда. Се надевам дека цела нервоза која ја чуваме од мечот со Украина, ќе го префрлиме на теренот“, вели Ристовски.

Англија е голем фаворит, една од најсилните селекции во Европа, па играњето во домот на Манчестер јунајтед против европскиот вицепрвак е посебно доживување.

„Сите играчи имаат големи натпреварувања и лиги. Играме против најголемиот фаворит во групата, селекција од светско ниво. Не ни треба посебен мотив. Ќе имаме исполнет стадион, тоа е доживување, генерално, за македонскиот фудбал и за сите наши гледачи да успееме спортски нешто да направиме“, додава Ристовски.

Македонија нема пораз на гостувањата кај Англија со две ремија од два меча, првото во 2002 со 2-2, а потоа без голови во 2006 токму на „Олд Трафорд“.