Трансфер на деценијата: Македонска репрезентативка ќе игра во најсилната лига во Италија!
Талентираниот бек потпиша договор со прволигашот Вигарано, каде што е најавено дека ќе биде дел од сениорскиот тим. Атанасовска е поранешна кадетска репрезентативка на Македонија, која, изненадувачки, досега не е повикувана да настапува за најдобриот состав на жолто-црвените. Таа првите кошаркарски чекори ги направи во Бадел 1862, а од 2017 година настапува за италијански екипи во младинска конкуренција.
„Пресреќна сум што ќе настапувам за екипа од најсилната италијанска лига, против далеку повозрасни, посилни и поискусни девојки. Едвај го чекам овој предизвик, а следниот период ќе го искористам за напорна работа, за да бидат подготвена да се носам со силните противнички. Првпат во Италија дојдов на 15 години и мојот сон беше еднаш да настапам во Серија А, што сега ќе ми се оствари. Досега девојките од оваа конкуренција ги гледав само на телевизија, а сега ќе може да игра со нив и против нив“, изјави Атанасовска.
Вигарано е тим од средината на табелата во најдобрата италијанска конкуренција, кој во нашата кошаркарка гледа голем талент за во годините кои следуваат.