Тодоров: Естонија мора да се совлада, но за место на ЕП ќе ни требаат уште една или две победи!

13 февруари 2020 - 11:26

Македонската кошаркарска репрезентација денеска официјално ги почнува подготовките за пласман на ЕП 2021 и тоа за претстојните воведни два дуели против Естонија и против Русија на гости и тоа со релативно подмладен состав и со желба да се оствари стартен триумф кој ќе ни ги подотвори вратите за следниот континентален собир.

Новиот селектор, Александар Тодоров, смета дека на располагање го има најсилниот состав во моментов и дека за место на ЕП нема да ни биде доволен само еден триумф.

„Ова е најоптималниот состав имајќи в предвид здравствениот билтен и волјата на одредени играчио. Веќе реков дека нема никого да молиме и искрено сум пресреќен што добив само еден негативен одговор од сите со кои разговарав. Важно е добро да се подготвиме во следните шест дена за Естонија и да останеме оптимално здрави за стартот на квалификациите. Имаме анализа за сите естонски играчи, знаеме што да очекуваме и кој ќе игра на која позиција. Искрено, не сметам дека воведниот меч со Естонсците ќе биде клучен и сметам дека ќе ни требаат втора па и трета победа“, изјави Тодоров.

Пресметката со Естонија е закажана за 20 февруари во салата „Борис Трајковски“, додека три дена подоцна ќе им гостуваме на Русите во Перм.