Војдан Стојановски кариерата ја продолжува во Германија!

24 јули 2018 - 11:25

Најдобриот македонски кошаркар во моментов, Војдан Стојановски, не успеа да се договор со шпанска Сарагоса со беше во напредни преговори, по што реши да ја прифати следната најдобра понуда и кариерата да ја продолжи во германскиот прволигаш Олденбург.

Ова денеска беше потврдено од управата на клубот кој минатата сезона ја заврши на седмата позиција на табелата во Бундес лигата и кој сосема солидно настапуваше во Лигата на шампионите на ФИБА. За Стојановски ова ќе биде враќање во добро познато првенство со оглед што веќе настапуваше две години во Германија и тоа во дресот на Алба (2013-2015).

„Војдан ќе биде големо засилување за нашиот тим, бидејќи секогаш е добредојдено да се има кошаркар со неговите квалитети и искуство. Може да игра на позициите 'два' и 'три', а човечките квалитети исто така му се исклучителни како и играчките, па не случајно е и лидер на македонската репрезентација“, вели тренерот на Олденбург, Младен Дријенчиќ.

Репрезентативецот минатата сезона беше дел од турскиот прволигаш Бујукчекмеџе, а досега во кариерата има настапувано уште и за шпанските екипи Андора и Реал Бетис, украински Черкаси мавпи и Доњецк како и за српски Напредак од Крушевац. Во Македонија играше за Вардар, АМАК-СП и за Фени индустри.