Шпански „АС“: Лука Дончиќ – суперхеројот кој го сруши Дражен и го надмина Џордан!

Иако остана без медал, неговите настапи предизвикаа воодушевување, а шпанскиот „АС“ го опиша како „суперхерој“. Дончиќ на турнирот имаше просек од 34,7 поени, 8,6 скокови, 7,1 асистенција и 2,7 украдени топки по натпревар. Најдобриот меч го одигра во осминафиналето против Италија со 42 поени, додека во четвртфиналниот пораз од Германија постигна 39 поени со 11 скокови и 7 асистенции. Вкупно, реализираше речиси 37-отсто од сите поени на Словенија – статистика која му беше недостижна дури и на најголемиот Мајкл Џордан.

И покрај критиките по трансферот од Далас во ЛА Лејкерс, Дончиќ го искористи летото за да ја подобри физичката подготвеност. Со нов режим на исхрана и интензивни тренинзи, изгуби повеќе од 10 килограми, што се одрази врз неговата игра. Разликата меѓу тимот кој во 2017 година го освои златото и сегашната репрезентација е огромна – тогаш покрај Дончиќ играа и искусни имиња како Драгиќ и Рендолф, додека денеска словенечкиот тим зависи речиси исклучиво од него.

На Евробаскетот, Дончиќ ги надмина статистиките на легенди како Дражен Петровиќ и се приближи до имиња како Никос Галис и Радивој Кораќ. Со само 26 години веќе е меѓу најголемите во историјата на ова натпреварување, покрај статусот што одамна го има во НБА.