Рекордерот Симјановски има потекло од Гостивар, ама за жал – изгубен е за Македонија!

Младиот талент, кој летово пристигна во Црвена звезда од Спартак Суботица, ги одигра првите минути и ги постигна првите поени во сениорска конкуренција, станувајќи најмлад дебитант на црвено-белите во 21. век – со само 16 години и три месеци. Иако презимето јасно упатува на македонски корени, Симјановски е роден во Суботица и веќе настапува за младинските селекции на Србија. Неговиот дедо е роден во Гостивар, но со родителите е роден во Србија, а истовремено поседуваат српски кошаркарски пасош, што автоматски ја затвора вратата за настап во македонскиот репрезентативен дрес. Барем по регуларен пат.

Со своето деби, Симјановски ги надмина и некои од легендите на Звезда – Никола Топиќ, Немања Недовиќ, Саша Обрадовиќ и Предраг Стојаковиќ дебитирале постари од него. Интересно е и дека неговиот брат Душан во минатото бил блиску до настап за Македонија, но во 3х3 кошарката, преку поранешниот репрезентативец Ервин Цого. И таа приказна заврши без епилог.