Магдевски: МЗТ нема што да загуби против тимот од соништата на Партизан!
Токму поради тоа, тој е интересен за српските медиуми, кои побараа негово мислење за претстојната пресметката од второто коло од АБА-лигата.
„Огромна е разликата од Партизан во мое време, кога клубот беше во финансиски проблеми и често менуваше тренери и сегашните црно-бели, кои имаат огромен буџет, звучни кошаркари и легенда како Жељко Обрадовиќ на клупата. Добро почнаа во АБА, ѝ дадоа сто поени на Цибона во Загреб, што доволно говори за нивниот квалитет“, вели Магдевски.
Македонскиот репрезентативец смета дека сино-белите нема што да загубат во пресметката во „Јане Сандански“.
„Се надевам на одлична кошаркарска атмосфера во понеделник и поддршка од нашите навивачи. МЗТ нема што да загуби на овој меч со оглед на квалитетот на противникот. Имаме обврска на домашна сцена пред овој дуел (утре против ТФТ-н.з.), по што енергијата ќе ја насочиме кон црно-белите“, дополнува плејмејкерот.
Магдевски сезоната во АБА не ја почна најдобро, со оглед што на гостувањето кај Црвена Звезда не постигна ниту еден поен со шут 0/6 од поле.