Шредер се врати во Лејкерс и потпиша едногодишен договор

17 септември 2022 - 10:17

Денис Шредер прави чудни потези во кариерата, но сега сака да ги поправи работите во таборот на Лос Анџелес лејкерс, каде не се прослави.

Германецот, кој игра фантастично за својата репрезентација на Евробаскетот реши уште еднаш да се обиде во златно-виолетовиот дрес на Лејкерс. Тој беше дел од тимот во сезоната 2020/2021, но не го продолжи својот престој иако Лејкерс му понудија договор од 84 милиони долари.

Сметаше дека може да добие повеќе пари во друг тим и многу погреши, бидејќи ниту еден тим не беше подготвен да му даде долг договор. Изминатата сезона играше за Бостон и Хјустон, па сега како слободен агент се враќа во Лејкерс и тоа на едногодишен договор вреден 2,4 милиони долари.

Леброн Џејмс веднаш го поздрави кам-бекот на Германецот во тимот, а наводно тој доаѓа на инсистирање на новиот тренер на Лејкерс, Дарвин Хем.