По речиси 19 години, заврши магичната серија на Леброн Џејмс

Најдобриот стрелец на сите времиња (42.268 поени) заврши со осум поени во драматичната победа на Лос Анџелес Лејкерс од 123-120 над Торонто Репторс. Место да се обиде сам да ја продолжи серијата, тој асистираше за победничкиот тројка на Руи Хачимура во последните секунди. Леброн имаше шанса да го изведе последниот удар и да ја обезбеди победата, а со тоа и продолжувањето на серијата. Сепак, тој се одлучи за она што постојано го нагласуваше во текот на својата 23-годишна кариера, „правилниот и најпаметен потег“ - го пронајде слободниот Руи Хачимура во левиот агол, а овој погоди за победа со звукот на сирената.

Иако серијата сега е завршена, победата очигледно беше сè што беше важно. Ова беше само деветтиот натпревар во кариерата на Џејмс во основен дел од сезона во кој постигна едноцифрен број поени. Последен пат тоа се случи на 6 јануари 2007 година.

Кога Џејмс ја започна неверојатната серија што заврши вечерва, првиот избор на драфтот оваа година, Купер Флег, имаше 15 дена, а најстариот син и соиграч на Леброн, Брон беше тукушто роден. Луѓето штотуку се запознаваа со социјалната мрежа Твитер (сега Х), а Џорџ В. Буш беше претседател на Соединетите Американски Држави.

Следниот факт открива колку е моќна таа серија. Најдолгата активна низа на натпревари со двоцифрен број поени сега ја држи Кевин Дурант, 37-годишен играч на Хјустон Рокетс. Тој е во серија од 267 последователни натпревари со 10+ поени. За да го достигне Џејмс, осмиот најдобар стрелец во историјата на НБА (30.996 поени), ќе треба да одигра 82 натпревари во следните речиси цели 13 сезони и никогаш да не заврши натпревар со едноцифрен број поени.

Најдолги низи од 10 поени во НБА:

Леброн Џејмс 1297 натпревари

Мајкл Џордан 866

Карим Абдул-Џабар 787

Карл Мелоун 575