Јокиќ постигна рекорд на кариерата, сѐ му уништи Расел Вестбрук (ВИДЕО)

02 април 2025 - 08:14

Денвер и Минесота приредија спектакл за кој уште долго ќе се зборува во НБА лигата и кој веројатно ќе остане еден од симболите на оваа сезона.

Славеа Тимбервулфс со 140-139 по две продолженија, а победникот се одлучуваше во фотофиниш. Блескаше Никола Јокиќ кој оствари рекорд на кариерата со 61 поен, комплетиран со трипл дабл затоа што оствари уште по 10 скока и 10 асистенции, но ни тоа не беше доволно Денвер да го победи својот најтежок ривал во лигата.

Сето тоа што го направи Јокиќ, уништи Расел Вестбрук во последните 20-тина секунди. Прво промаши чисто положување при водство на Денвер од 139-138, а потоа, со истекот на времето направи лична грешка на шут за тројка над Александер-Вокер. Кошаркарот на Минесота ги погоди првите две слободни фрлања кои беа доволни за победа на неговиот тим.

Тоа е четврта победа по ред и шеста на последните седум меча за Минесота против Денвер. Не е исклучено овие две екипи да се сретнат и во првата рунда од плејофот бидејќи Денвер во моментов е трет, а Минесота седмопласирана, со идентичен биланс (44/32) како Мемфис кој е шести.

Кај Вулфс на овој меч се истакнаа Едвардс со 34 и Рендл со 26 поени. Покрај Јокиќ, во тимот на Денвер, Гордон постигна 30 поени.

РЕЗУЛТАТИ
Атланта - Портланд 113-127
Милвоки - Феникс 133-123
Њујорк - Филаделфија 105-91
Чикаго - Торонто 137-118
Мемфис - Голден Стејт 125-134
Сан Антонио - Орландо 105-116
Денвер - Минесота 139-140