Харден и Вестбрук мелат се пред себе, Филаделфија со историјска партија против Кливленд (ВИДЕО)
Популарниот „Брада“ потроши многу топки, но на крајот се исплатеше за нов триумф на својот тим. Тој забележа 34 поени, 6 скока и 4 асистенции, а неговиот учинок од поле беше 8/27, односно 3/17 од линијата за три поени. За негова среќа, расположен беше Вестбрук кој го оствари третиот трипл-дабл учинок во низа, а заврши со 24 поени, 14 скока и 11 асистенции. На спротивната страна, како и по обичај, најефикасен играч беше Девон Букер со 35 поени и 5 асистенции.
Партија на кариерата одигра Бен Симонс во историската победа на Филаделфија против Кливленд. Сиксерс доминираа со 141-94, остварувајќи учинок од 11-0 на домашен терен на стартот од оваа сезона. Последен пат Филаделфија запиша 11 победи на домашен терен во низа во сезоната 1966/67. Симонс мечот го заврши со 34 поени и 7 асистенции.
На преостанатите два натпревари Индијана славеше на гостувањето кај Њујорк со 104-103, додека Јута беше подобра против Мемфис со 126-112.