Еден натпревар - куп рекорди на Јокиќ

02 април 2025 - 08:57

Одамна е јасно дека Денвер Нагетс без Никола Јокиќ се потпросечна екипа која би се борела за место во плејаутот, но и покрај тоа, српскиот ас продолжува да импресионира со своите настапи и да ги изненадува дури и своите најголеми фанови.

Така беше и на мечот против Минесота кој Денвер минимално го загуби, но на него Јокиќ оствари еден куп рекорди. Листата на остварувања само од денешниот дуел е импресивна.

На натпреварот со Минесота, тој постави рекорд по постигнати поени сезонава во НБА и личен рекорд во најсилната светска кошаркарска лига (61). Потоа, се израмни со Шекил Онил по бројот на натпревари со над 50 поени (3), а на теренот помина 53 минути, исто така најмногу во својата кариера. Неговиот трипл дабл е прв со 60+ поени на еден центар во историјата на НБА и со најмногу постигнати поени. Досега рекордот го држеа Џејмс Харден и Лука Дончиќ кои имаа трипл дабл со 60 поени.

Јокиќ е прв играч по Мајкл Џордан со 60+ поени за 50+ минути на теренот, но и прв кој загубил, а притоа остварил трипл дабл со 60+ поени. Се израмни со Вилт Чембрлен по бројот на трипл дабл натпревари на играч на центарската позиција во една сезона (31) во историската вечер во која стана прв кошаркар со 60+ поени, 10+ скокови, 10+ асистенции и 5+ погодени тројки.

Освен ова, Јокиќ стана петти центар во историјата на НБА со 800 тројки, по Карл Ентони Таунс, Брук Лопез, Никола Вучевиќ и Ал Хорфорд.