Евролига се прошири надвор од Европа – прими и трет тим од АБА-лигата!

Официјалната потврда сè уште се чека, но сопственикот на италијанскиот клуб Виртус Болоња, Масимо Занети, откри дека договорот е постигнат. Тој на прес-конференција изјави дека Дубаи ќе игра во најсилното европско клупско натпреварување од следната сезона.

„Во моментов многу се зборува за НБА, но Евролигата останува најважното натпреварување. Ќе има многу можности за ова натпреварување, особено бидејќи од следната сезона Дубаи ќе игра во Евролигата“, изјави Занети.

Дубаи сезонава дебитираше во АБА лигата и моментално е на третото место со биланс 20-5. Тимот веќе има респектабилен состав со играчи како Дејвис Бертанс, Клемен Препелич, Авуду Абас и Данило Анѓушиќ. Очекувањата се дека влезот во Евролигата ќе привлече уште поголеми имиња. Во медиумите неодамна се шпекулираше за доаѓањето на Дарио Шариќ, кој наводно го одбил Реал Мадрид поради Дубаи, но неговиот агент, Мишко Ражнатовиќ, ги демантираше тие информации.

Тимот неодамна го продолжи договорот со тренерот Јурица Големац, што дополнително ја зацврстува стабилноста пред настапот во новото натпреварување. Оваа година Фајнал фор на Евролигата ќе се одржи во Абу Даби, што се поклопува со проширувањето на натпреварувањето во регионот.