Димитријевиќ двоцифрен во уште една голема победа на Баерн Минхен!

29 јануари 2026 - 23:27

Македонскиот репрезентативец (кога му се игра), Ненад Димитријевиќ, одигра уште еден солиден натпревар во Евролигата, а неговиот Баерн Минхен забележа значајна победа на гостувањето кај Хапоел Тел Авив (79-64), во меч одигран во Ерусалим.

„Баварците“ ја контролираа играта против една од водечките екипи на табелата и рутински стигнаа до нови бодови, потврдувајќи ја добрата форма во елитното натпреварување. Димитријевиќ го одигра третото последователно коло со двоцифрен поентерски учинок, постигнувајќи 11 поени, со еден скок и една асистенција. Најефикасен во редовите на Баерн беше Мајк со 16 поени, додека кај Хапоел најмногу се истакна Мициќ со 13 поени.

Во дербито на вечерта, Фенербахче убедливо го совлада Анадолу Ефес со 79-62 и се искачи на првото место на табелата. Хортон-Такер блескаше со 22 поени, а искусниот Де Коло додаде 12, додека кај Ефес, Ли заврши со 19 поени. Победа запиша и Олимпијакос, кој пред својата публика беше подобар од Барселона со 82-72. Лидер на тимот од Пиреја беше Александар Везенков со дабл-дабл учинок од 20 поени и 11 скока, додека кај Каталонците најрасположен беше Пантер со 15 поени.