Српски МТЕЛ и официјално ги „обедини“ МЗТ и Работнички (ФОТО)

Ова значи дека членката на телекомуникациската групација Телеком Србија го направи речиси невозможното, односно ги збратими двата најголеми ривали со оглед што веќе една година наназад е спонзор и на Работнички. Договорот на аеродромци со МТЕЛ е едногодишен, а сумата остана во тајност.

„Потпишување спонзорски договор со компанија како МТЕЛ е уште еден доказ МЗТ Скопје е препознатлив бренд не само во Македонија туку и пошироко во регионот. Верувам дека ќе ја оправдаме довербата и дека ова е само почеток на една подолгорочна соработка помеѓу субјекти кои се лидери во својата бранша. Помошта и тоа како ќе ни биде добредојдена, со оглед што и оваа сезона нашите амбиции се највисоки, односно атак на врвот во секое од натпреварувањата во кои ќе настапуваме“, изјави директорот на МЗТ, Филип Ѓоревски.

Задоволство и гордост од склучениот договор изјавија и луѓето од српската компанија.

„Горди сме што како компанија имаме можност, но и големо задоволство да бидеме дел од успешната приказна на МЗТ Скопје. Среќни сме што ја продолжуваме традицијата на нашата компанија во рамки на своите можности да ги поддржиме спортските клубови, а преку тоа да придонесеме кон поздрава и поактивна младина, што во денешницата е од особена важност“, нагласи генералниот директор на МТЕЛ, Марко Лопичиќ.

На денешната прес-конференција присуствуваа уште и градоначалникот на општина Аеродром, Тимчо Муцунски, како претставник на целосниот сопственик на МЗТ, како и Владмир Лучиќ, генералниот директор на Телеком Србија.