Симиќ и Чековски остануваат на кормилото на Работнички!

12 јануари 2022 - 11:50

Македонскиот кошаркарски тим Работнички остро ги демантираше шпекулациите на дел од медиумите дека ќе се раздели со предводниците на екипата, Тони Симиќ и Ѓорѓи Чековски.

Работнички се соочи со финансиски проблеми, меѓутоа преку официјално соопштение потврди дека наскоро ќе бидат надминати, а притоа потврди дека во клубот остануваат двете легенди на македонската кошарка.

„Имајќи ги предвид тековните активности со формирањето на комисиите во новиот Совет на Општина Центар и смената на општинските раководства, Ве известуваме дека сите тековни проблеми, особено оние поврзани со неисплатените плати на играчите, наскоро ќе бидат надминати.

Апелираме до спортските медиуми и новинари, да ги проверуваат информациите, да се повикуваат на релевантни извори и да не подлегнуваат на лаги и манипулации креирани само и единствено да нанесат штета на еден од најпознатите македонски кошаркарски брендови.

Ве известуваме дека стручниот штаб на КК Работнички, предводен од двете легенди на македонската кошарка, Тони Симиќ и Ѓорѓи Чековски, остануваат да го водат клубот и имаат целосна поддршка како од раководството на Работнички, така и од Општина Центар“, соопштија од Работнички.