Пелистер ја намачи Блокотехна, Струмица конечно дојде до втората победа

21 јануари 2018 - 20:11

Кошаркарите на Блокотехна продолжија да му дишат во врат на неприкосновениот лидер во Првата лига Работнички, откако вечерва, далеку потешко од очекувањата, дојдоа до триумф на гостувањето кај Пелистер (73-67).

Гевгеличани доминираа во првото полувреме и со убедливи 15 поени го завршија првото полувреме (43-28). Но, домаќинот не се предаде и со голема упорност дојдоа до неизвесен финиш во кој поискусните гости подобро се снајдоа. Бенџамин Двејн со 19 поени беше најпрецизен кај Блокотехна, Данило Мијатовиќ постигна 14, а Антон Казарновски 11 поени. Луис Роберт со 27 поени беше најефикасен кај Пелистер.

Кошаркарите на Струмица, пак, конечно дојдоа до втората победа сезонава и тоа на домашен терен против младинскиот состав на Карпош Соколи (86-71). Разликата беше очигледна, а триумфот на домаќинот заслужен. Димитар Делипетров со 25 и Дамјан Стојменов со 16 поени беа најефикасни кај струмичани додека Здравко Богдановски со 14 и Лука Петровски со 12 поени беа најпрецизни кај „соколите“.

Претходно, во 13.. коло, Работнички како гостин убедливо го совлада Фени индустри, Кожув минимално го изненади Гостивар, а Куманово беше подобар од АВ Охрид во дербито на колото. Рундата се затвора в среда, кога МЗТ Скопје ќе го пречека Шкупи.