Рома ќе го распродаде „Олимпико“ за финалето во Лига Европа – веќе купени 50.000 билети

28 мај 2023 - 17:35

Италијанска Рома откако за неполни 12 часа ги распродаде сите 15.000 влезници за навивачите кои ќе патуваат во Будимпешта за финалето во Лига Европа против Севилја во среда, ќе го распродаде и „Олимпико“ откако ги пушти влезниците за гледање на мечот на римскиот фудбалски храм и веќе се купени – 50.000 билети.

Според информациите од Италија, навивачите на Рома кои не успеале да дојдат до влезница за „Ференц Пушкаш“ во Будимпешта, ќе имаат шанса да го гледаат мечот на „Олимпико“ и тоа за 14 евра за тие со сезонски карти, а 20 евра за секој навивач кој сака да присуствува.

За очекување е дека до среда сите влезници ќе бидат купени, настрана што се очекува барем 20.000 навивачи од Рим да заминат во унгарската престолнина, дел од нив и без влезници само за да бидат близу случувањата во обид да се оствари нов европски успех.

Рома лани во Тирана ја освои Конференциската лига, а сега втора година по ред игра европско финале, сега во Лига Европа, во втората сезона под палката на Жозе Мурињо, а освен пехарот „волчицата“ со победа би обезбедила и учество во Лигата на шампионите во идната сезона.