Меси во солзи по драмата со Египет: Мислев дека ги разочарав сите (ВИДЕО)

08 јули 2026 - 11:16

Аргентина со спектакуларен пресврт го елиминира Египет (3-2) во осминафиналето на Светското првенство и обезбеди место меѓу осумте најдобри репрезентации на турнирот, а по натпреварот емоциите целосно го совладаа капитенот Лионел Меси.

Иако беше еден од хероите во големиот триумф, аргентинската суперѕвезда призна дека по промашениот пенал почувствувал дека ги разочарал своите соиграчи.

„Искрено, тоа што го направи овој тим е лудо. Успеавме да се вратиме од 0-2 во елиминациски натпревар на СП, а на ваков турнир никој ништо не ви подарува. Навистина е тешко да се пробие противникот и да се постигне гол. Овој тим уште еднаш покажа дека знае да се натпреварува, дека никогаш не се предава и се бори до самиот крај. Денес ги оттурнавме сите сомнежи. Тоа е она што секогаш нè краси – борбеноста до последната секунда. Заплакав бидејќи се чувствував како да ги разочарав своите соиграчи со промашениот пенал. Начинот на кој го изведов... Сепак, благодарение на Бог, на крајот повторно се случи нешто специјално и среќен сум“, изјави Меси.

Капитенот на Аргентина не ги криеше солзите по последниот судиски свиреж, а притоа нагласи дека најголемата заслуга за пласманот во четвртфиналето ја има целиот тим, кој уште еднаш покажал карактер и победнички менталитет. Во борбата за место во полуфиналето, Аргентина ќе се соочи со Швајцарија, против која ќе ја има фаворитската улога.