Леверкузен го пронајде идеалниот наследник на Алонсо - Шпанец од Серија А!

09 мај 2025 - 19:14

Според информациите на шпанска „Марка“, германскиот гигант Баер Леверкузен го избрал Сеск Фабрегас како свој прв приоритет за наследник на Чаби Алонсо кој денеска потврди дека заминува по завршувањето на сезоната.

Во Фабрегас, Леверкузен гледа сè што имаше и со Алонсо, млад, талентиран и енергичен тренер со силен карактер и напаѓачка филозофија на игра.

На Шпанецот му оди одлично оваа сезона на клупата на италијанскиот Комо, клуб во кој има и сопственички удел. Минатиот месец беше најуспешниот во неговата тренерска кариера и го доби признанието за тренер на месецот во Серија А по серијата победи против Монца, Торино, Лече и Џенова.

Во фудбалските кругови, Фабрегас веќе добива етикета „Алонсо 2.0“, со оглед на сличниот пат што двајцата поранешни шпански репрезентативци го минуваат како тренери со брз подем и препознатлив стил.

Шпанските медиуми дополнуваат дека челници на Баер веќе оствариле средба со Фабрегас и му ги презентирале своите планови, но сè уште се чека неговата конечна одлука.

Фото: Bayer 04 Leverkusen/FB