Гвардиола има понуда да му биде тренер на Роналдо за 90 милиони евра

Каталонскиот стручњак ќе заврши една деценија исполнета со страст, работа и успех, со убедување дека неговата мисија на „Етихад“ е исполнета. Неговото враќање на тренерскиот пазар предизвика вистинска лавина од понуди, тврдат шпанските медиуми.

Името на Гвардиола е привлечно за бројни управи и фудбалски асоцијации. Иако е под договор со Сити, Каталонецот отсекогаш бил поврзуван со врвни клубови и елитни национални тимови. Самиот Гвардиола постојано изјавуваше дека е привлечен од идејата да ја води репрезентацијата, што би било сосема ново искуство за него во кариерата што ја започна во Барселона Б.

Според шпанскиот Спорт, оваа можност веднаш активираше неколку асоцијации кои сонуваат за натпреварувачки пробив под водство на каталонскиот тренер. Обединетите Арапски Емирати и Саудиска Арабија наводно веќе покажаа интерес за неговите услуги по веста за неговото можно заминување од Сити.

Во случајот со Саудиска Арабија, постои интерес и од Ал Наср кој синоќа ја освои шампионската титула во домашното првенство, а од претходно беше познато дека тренерот Жорге Жезус ќе си замине по завршувањето на сезоната. Шпекулациите велат дека Гвардиола има мега богата понуда, со износи што би можеле да достигнат до 90 милиони евра по сезона, вклучувајќи плата и бонуси.

Мароко исто така внимателно ја следи ситуацијата на Гвардиола. Мароканската федерација во него гледа фигура способна да го забрза нивниот проект и да го консолидира тимот како стабилна сила на светската сцена. На клупско ниво, Италија е исто така на радарот. Милан и Јувентус долго време посакуваат тренер со висок профил за да ја вратат својата стара сила во Европа. Во овие случаи, сè уште нема формална понуда, но постои јасен интерес ако Гвардиола одлучи да се врати на клупата без претходно меѓународно учество.

Сепак, се чини дека Гвардиола засега има прилично јасен план за својот следен чекор и нема намера веднаш да прифати никаква позиција. Гвардиола сака да се одмори, да земе една година пауза и да се оддалечи од очите на јавноста по една деценија напорна работа во Манчестер. Неговата идеја е да се исклучи и да почека вистинскиот момент да се врати со проект што навистина ќе го мотивира.