ФИФА почна да забегува: На СП во Катар наместо судии ќе има – роботи?!

Директорот за технологии во ФИФА, Јоханес Холцмилер во разговор за германска АРД истакнал дека се размислува роботи да ги заменат линиските судии, а револуционерната промена треба да се тестира на клупското СП на крајот на годинава, пред да се донесе одлука дали системот добро функционира и ќе може да биде имплементиран на Мундијалот.

Новиот систем со роботи треба да се воведе како исправка на грешките што ВАР ги покажува, а идејата е роботите крај линијата постојано да бидат во линија со последниот дефанзивец и да „влечат линии“, а ако некој се најде во недозволена ситуација да го алармираат главниот судија.

„Идејата на проектот е да се забрза прегледувањето на снимките и да се олесни работата на ВАР. Линиите за офсајд нема да ги влечат судиите во ВАР-собата, туку роботите, па процесот ќе се забрза. Во моментов линиите се влечат откако ќе се замрзне сликата при спорниот момент, па се анализираат и сето тоа одзема време. Но, некогаш ни снимките не се добри за да се фати моментот при додавањето“, вели Холцмилер.