ФИФА го одби Иран, хаосот околу Мундијалот продолжува

ФИФА нагласи дека нема планови за промена на распоредот и дека очекува сите екипи да учествуваат според претходно објавениот распоред.

„ФИФА е во редовен контакт со сите учесници и нивните фудбалски асоцијации, вклучувајќи го и Иран, за да разговара за планирањето на Светското првенство во 2026 година. ФИФА со нетрпение очекува сите екипи да се натпреваруваат според распоредот на натпревари објавен на 6 декември 2025 година“, објави ФИФА

Иранската фудбалска федерација тврдеше дека е во преговори со ФИФА за преместување на натпреварите на тимот од Лос Анџелес и Сиетл во Мексико, поради загриженост за безбедноста на нивните играчи. Оттаму се обидоа да извршат притисок откако американскиот претседател Доналд Трамп минатата недела изјави дека „не е соодветно“ иранскиот тим да патува во САД поради безбедносни причини.

Неговата објава дојде два дена откако претседателот на ФИФА, Џани Инфантино, по состанокот со Трамп изјави дека Иран е „добредојден“ во САД за турнирот и покрај тоа што земјите се во војна. Иранската федерација соопшти дека е во преговори со ФИФА за преместување на натпреварите од Лос Анџелес и Сиетл во Мексико, но ФИФА изјави дека таков потег не е изводлив бидејќи билетите веќе се продадени и ќе влијае на другите тимови.

Иран треба да игра против Нов Зеланд и Белгија во Лос Анџелес на 15 и 21 јуни, а против Египет во Сиетл на 26 јуни. Доколку и Иран и САД завршат втори во своите групи, тие ќе се сретнат во осминафиналето на 3 јули во Далас. Во случај Иран да се повлече, ФИФА има право да одлучи која земја ќе го замени, а Ирак и Обединетите Арапски Емирати се најверојатни кандидати.