Вратата кон Евро 2020 е ширум отворена: Македонија ќе биде носител во Лига на нации!
Шансата за Македонија да игра на едно Европско првенство се зголемува со Лигата на нации, затоа што преку најслабата, четврта лига во ова натрпеварување, ќе се добие едно место за континенталниот шампионат, а со улогата на носител на црвено-жолтите широко им се отвораат вратите. Ова значи дека во групата ќе има три послаби противници и ќе бидеме први фаворити за првото место кое носи во плејофот во март 2020 година, кога четирите најдобри од четирите групи во оваа лига Д преку полуфинале и финале ќе дадат еден учесник на Евро 2020.
Македонија пред завршните два квалификациски мечеви во овие мундијалски квалификации беше петта според рејтингот на УЕФА во лигата Д, со многу мала разлика во рејтингот во однос на Ерменија (0,020 рејтинг-поени), која загуби со 1-6 од Полска пред три дена во квалификациите. УЕФА го прави рејтингот врз база на настапите на официјалните мечеви (без пријателски) во последните три циклуси на секоја селекција, па секоја победа и реми носат одредени бодови, кои потоа се делат по број на одиграни мечеви...
Ова е официјалниот ранкинг на УЕФА пред октомвриските мечеви
Така, Македонија со ремито кај Италија сега ја прескокна Ерменија, а низа страници кои ги сметаат овие коефициенти и кои со години важат за релевантни и точни, сега пресметаа дека Македонија е по рејтинг подобра од ерменската селекција и дека победа против Лихтенштајн тоа треба да го потврди. Ерменија во последното коло утре игра со Казахстан на гости, кој е последен, па победа на Ерменците нема да има никакво значење, ако Македонија задутре победи со слабиот Лихтенштајн. Во таква ситуација Македонија и Ерменија би освоиле ист број на бодови за рејтингот, па разликата според специјализираните страници би останала иста (0,300 рејтинг-поени).
Ова е ранкингот на УЕФА според специјализирани страници по одигрувањето на претпоследните мечеви во квалификациите
Ждрепката за Лигата на нации е закажана за на 24 јануари, а како што претходно објави УЕФА во септември идната година ќе стартува новоформираното натпреварување во кое по комплетирањето на групната фаза до ноември истата година ќе се знае кој ќе оди во плејофот. Од март 2019 до ноември 2019 ќе се играат европските квалификации, а во март 2020, четири месеци пред Евро 2020 низ полуфиналиња и финалиња во четирите лиги од А до Д ќе бидат познати четирите последни патници на ЕП.
Со носителска улога Македонија во најслабата лига против „фри-шоп држави“ треба да покаже резултатски многу повеќе од досега и без проблем да ја освои групата со што би направиле чекор понапред кон историски настап на континентален шампионат. Оваа шанса и вака широко отворена врата не треба да се пропушти.
ЗАБЕЛЕШКА: Иако рејтингот според УЕФА и според одредени страници се разликуваат во бројките, станува збор за различни методи на пресметки и како што потенцираат овие специјализирани страници шансата за промена во рангирањето и грешка е речиси невозможно.