Јуни ни е најцрн месец: Едвај две победи од 18 меча во - 10 години!

10 јуни 2022 - 09:00

Македонија доживеа убедлив пораз синоќа од Грузија со 0-3, па првото место реално стана недостижно, иако теоретски сѐ уште сме во игра, па ова беше 12-от пораз на македонската репрезентација во последнава деценија во мечеви кои се играат во јуни!

Верувале или не, ама јуни е најцрниот месец за македонскиот А-тим. Од 2012 година наваму севкупно во 18 мечеви, едвај двапати сме победиле и тоа лани со Казахстан со 4-0 во последната поготовка за Еуро 2020 и во неделата кај Гибралтар со 2-0 во второто коло од овој циклус во Лигата на нации. Четири ремија имаме во овој јунски термин и 12 порази, а од победиве само една е за бодови, неодамнешната на Карпата.

Оваа статистика отвора многу прашања, ама очигледно Македонија има сериозен проблем кога доаѓа најтешкиот термин за играње, јуни, период после завршување на сезоната, во кој и психичката и физичката подготовка е најтенка. А, ова што во овој нехуман циклус со четири меча во десет дена годинава ни се случува е опомена за идната година, зашто во јуни повторно има циклус, за евроквалификациите со два меча и тоа во уште потежок период, втората половина од месецот (16 и 20 јуни).

Поразот на Македонија од Грузија вчера е пресликан истиот од Австрија пред три години, кога загубивме со 1-4 и на теренот делувавме издишано и исцрпено, па противникот знаеше како да нѐ казни и да ни ја наполни мрежата.

Ова се сите мечеви кои Македонија во изминатава деценија наваму ги има одиграно во јуни, со тоа што мечеви не сме играле во овој термин во 2012 и во 2018 година. Среќа, па во недела ни доаѓа Гибралар за да ја запишеме третата победа во 19-от јунски меч во последниве десет години.

2013 ГОДИНА

3 јуни (Малме) – Шведска 0-1 – пријателска

11 јуни (Осло) – Норвешка 0-2 - пријателска

2014 ГОДИНА

18 јуни (Шенјанг) – Кина 0-2 – пријателска

22 јуни (Жинан) – Кина 0-0 - пријателска

2015 ГОДИНА

14 јуни (Жилина) – Словачка 1-2 – квалификации Еуро 2016

2016 ГОДИНА

2 јуни (Скопје) – Иран 1-3 - пријателска

2017 ГОДИНА

5 јуни (Скопје) – Турција 0-0 – пријателска

11 јуни (Скопје) – Шпанија 1-2 – квалификации СП 2018

2018 ГОДИНА

без мечеви во јуни

2019 ГОДИНА

7 јуни (Скопје) – Полска 0-1 – квалиификации Еуро 2020

10 јуни (Скопје) – Австрија 1-4 – квалификации Еуро 2020

2021 ГОДИНА

1 јуни (Скопје) – Словенија 1-1 – пријателска пред Еуро 2020

4 јуни (Скопје) – Казахстан 4-0 – пријателска пред Еуро 2020

13 јуни (Букурешт) – Австрија 1-3 – Еуро 2020

17 јуни (Букурешт) – Украина 1-2 – Еуро 2020

21 јуни (Амстердам) – Холандија 0-3 – Еуро 2020

2022 ГОДИНА

2 јуни (Разград) – Бугарија 1-1 – Лига на нации

5 јуни (Гибралтар) – Гибралтар 2-0 – Лига на нации

9 јуни (Скопје) – Грузија 0-3 – Лига на нации

ВКУПНО: 18 меча – 2 победи, 4 ремија, 13 порази