Елмас позитивен на Ковид, нема да игра со Косово!

03 октомври 2020 - 17:07

Голем шок за Македонија доаѓа од Неапол, откако предмалку Наполи објави дека македонскиот бисер Елиф Елмас има коронавирус, што значи дека фудбалерот за врска нема да игра против Косово на историскиот меч закажан за во четврток во Скопје.

Ужасна вест доаѓа од Апенините, откако Елмас на новото тестирање во Наполи е позитивен на новиот вирус, што е само продолжение на хаосот што се случува во италијанското Калчо откако избувна епидемија во Џенова и во клубот на Горан Пандев веќе има 17 заразени, но нашиот капитен не е меѓу нив.

Позитивниот наод на Елмас ќе значи дека тој отпаѓа од списокот кој сè уште не го соопштил селекторот Игор Ангеловски и е еден сериозен хендикеп за македонската селекција. Елмас е втор македонски репрезентативец кој поради коронавирусот нема да игра на мечеви за националниот тим, откако минатиот месец голманот Столе Димитриески од оваа причина отпадна за пресметките со Ерменија и Грузија.