Кошмарен старт за Пелистер: Ла Риоха се прошета низ Битола!

30 септември 2026 - 22:15

Македонскиот вицешампион Пелистер доживеа тежок пораз (24-31) против Логроњо Ла Риоха среде Битола во првото коло од Европската лига.

Битолчани имаа лош старт на натпреварот и првиот гол го постигнаа дури во шестата минута (1-6), по што не успеаја да влезат во ритам, а тоа го искористи Ла Риоха за да замине на полувреме со водство од 16-8.

Ла Риоха ја контролираше играта и во вториот дел, додека Пелистер правеше грешки во нападот, а притоа одбраната не функционира, па така гостинскиот тим во еден момент стигна до +11 (28-17).

Пелистер до крајот на средбата заигра за нијанса подобро и успеа да ја намали негативата на конечни 24-31.

Најефикасен во победата на Ла Риоха беше Алваро Мартинез Лобато со шест голови, додека Самоил Ристевски и Петар Атанасијевиќ постигнаа по четири погодоци за Пелистер. Одличен настап имаше и голманот на гостите, Хоан Ледо кој одбрани 20 удари.