Пачовски го напушти Боби Милевски - си замина од стручниот штаб на А-тимот!

13 август 2023 - 09:21

Дека наскоро ќе дојдат целосни промени во стручниот штаб на фудбалската репрезентација на Македонија покажува и заминувањето на легендарниот голман, Томе Пачовски, кој прв јавно објави дека повеќе не е дел од тимот на се уште актуелниот селектор, Боби Милевски.

Тој лани во март стана дел од стручниот тим во националниот состав, каде што се грижеше за формата на чуварите на мрежата, а денеска и официјално се збогува со оваа функција.

„Секое патување некогаш мора и да заврши. Работата со репрезентацијата за мене беше нешто специјално. Дресот на Македонија за мене беше детски сон, а отсега ќе бидам најголем навивач на избраниот тим“, напиша Пачовски, кој 46 пати го носеше дресот на жолто-црвената селекција.

Заминувањето на поранешниот голман на Пелистер, Работнички, Вардар, Бершот и Мехелен може да се сфати и како потврда на најавите дека Милевски наскоро ќе биде сменет од селекторската функција, за чие пополнување, барем според српските медиуми, најсериозен кандидат е Црногорецот Миодраг Божовиќ. Пачовски кариерата ќе ја продолжи како тренер на голманите на белгискиот прволигаш Бершот, каде што работи од почетокот на минатата сезона.